उदयपुर
लगातारको बर्षाकाकारण उदयपुरका राष्ट्रिय राजमार्ग र स्थानीय सडकहरु अवरुद्ध भएका छन् । एक सातादेखि परेको पानी नरोकिएपछि मदन भण्डारी, सगरमाथा, सिद्धिचरण राजमार्ग र ग्रामिण सडकको ठाउँ-ठाउँमा पहिरो जाँदा सडक अवरुद्ध भएका हुन् ।
सगरमाथा राजमार्गको रौतामाई गाउँपालिका ५ छामलिङ्ग र जल्केनी विचको कुण्डले भिरको पहिरो वग्दा सडक अवरुद्ध छ । दुबै ठाउँमा सडक सूचारु गर्न आयोजना कार्यालयले लोडर मेसिन पठाएपनि पानी नरोकिएकाकारण सफा गर्न नसकिएको रौतामाई ५ का वडाध्यक्ष पाण्डोव राईले बताए । 
अवरुद्ध सडक सुचारु नहुँदा खोटाङ्ग र उदयपुरको ग्रामिणभेगबाट यातायातका साधनबाट सदरमुकाम गाईघाट झरेका सर्वसाधरणले सास्ति व्यहोर्नु परेको छ । पहिरो नरोकिएकाकारण पैदलयात्राबाट आवतजावत गर्नसमेत कठिनाई भएको उनले बताए ।
राईले भने, ‘जोखिम मोलेर सर्वसाधरण सडक माथिको पहिरो हेर्दै कुद्नु पर्ने बाध्यता छ, अझ विरामीलाई पिढ्युमा बोकेर पहिरो कटाउनुको समस्या झनै छ । ‘खुट्टा भाचिँएर उपचारका लागि जिल्ला अस्पताल ल्याईदै गरेका स्थानीय बखतबहादुर राईलार्ई भर्खरै जोखिम मोलेर पिढ्युमा बोकेर पहिरो कटाउन बाध्य भयौ, उनले भने, ‘आयोजनालाई सडक सुचारु गर्न भनेका छौ मेसिन पनि आएको छ, मौसमलेगर्दा काम गर्न सक्ने अवश्था छैन् ।
आयोजना प्रमुख गोपाल खकुरेलले पहिरो सफा गर्न लोडर र प्राविधिक टोली पठाइएको र आईतबारसम्म सूचारु हुने बताए । मदन भण्डारी राजमार्गकोसमेत प्रमुखको जिम्वेवारी सम्हालेका डिई खकुरेलले पहिरो पन्छाउन ठाउँ-ठाउँमा मेसिन राखिएको र काम भईरहेको बताए । उनले पुर्विखण्डको खैरहा र असारी खोलामा केहि समस्या देखिएपनि समाधानका लागि प्रयास भईरहको बताए ।
पश्चिमी खण्डमा मौवासी खोलले ह्युमपाईप वगाउँदा यातायात वारपार गर्न समस्या भएको बताए । बाँकी ठाउँमा पहिरो पन्छाउँदै भएपनि यातायात सुचारु गरिएको उनको भनाई छ । सिद्धीचरण राजमार्गको मिर्चैया-कटारी-घुर्मि खण्डमा पहिरो वग्दा यातायात अवरुद्ध छन् ।
रौतामाईको आँपटार क्षेत्र मात्र हैन् अधिकांस ग्रामिण सडकको अवश्था उस्तै छ । खोटाङ्गबाट पैदलयात्रा गरी गाईघाट झर्दै गरेका गोपाल अधिकारी भन्छन्, ‘राजमार्गको अवश्था त यो छ, गाउँपालिकाको लगानीमा भर्खरै खुलेका ग्रामिणभेगका सडकको अवश्था के हालत होला एक पटक नजर लगाउनुस ।
लगातारको बर्षाकैकारण सदरमुकाम गाईघाटसँग जोडिने रौतामाई, उदयपुरगढी, ताप्लि, लिम्चुङ्गबुङ्ग गाउँपालिका र कटारी नगरपालिकाका ग्रामिण सडक अवरुद्ध छन् । त्यस क्षेत्रमा यातायातका साधनहरु सञ्चालनमा आउन सकेका छैनन् । सदरमुकामको वरुवा खोलाले पुर्वपश्चिम बसपार्क छेउ र पिकनिक स्पोर्ट नजिकका बाँध कटान गर्न सुरु गरेको छ ।
बेलका नगरपालिकाको वडानं १,२,३ मा सप्तकोसी नदी र त्रियुगा खोलाले खेतीयोग्य जमिन कटान गरेको उपमेयर जिरा राईले बताईन् । उनले नियन्त्रणका लागि सशस्त्र, नेपाल प्रहरी र स्थानीय परिचान गरिएको बताईन् । सदरमुकामको त्रियुगा र बरुवा बसपार्कले धार परिवर्तन गर्दा बजार जलमग्न छ ।
त्यसैगरी चौदण्डिगढी नगरपालिका ५ शिवाईमा त्रियुगा खोलाले भर्खरै निर्माण गरिएको बाँध भत्काउँदा खेतीयोग्य जमिन वगरमा परिणत भएको स्थानीय भाष्कर चौधरीले बताए । प्रमुख जिल्ला अधिकारी बिरेन्द्रकुमार यादवले जनताको ज्युधन सुरक्षाका लागि आवश्यक अनुसार सुरक्षाकर्मी नदी नियन्त्रणमा परिचालन गरिएको बताए ।
उनले बर्षा तत्काल नरोकिने देखिएकाले नदी आसपासका क्षेत्रमा उच्चसतर्कता अपनाउन सर्वसाधरणलाई अपिल गरिएको बताए । उनले बस्ति सुरक्षित गर्न स्थानीय तहसँग समन्वय गरी सुरक्षाकर्मीको टोली परिचालन गरिएको बताए । जिल्लाका सप्तकोसी नदी, त्रियुगा, बरुवा, ककरु, तावा, मरुवा, लुहाले, बैद्यनाथ, यारी, लामा, खैराहा, वविया लगायत दर्जनौँ खोलामा पानीको बहाव उच्च भएसँगै बाढीको जोखिम बढेको छ ।
फोटो क्याप्सन ः सगरमाथा राजमार्ग अन्र्तगत रौतामाई गाउँपालिका वडानं ५ स्थित छामलिङ्ग र जल्केनी विचको कुण्डले भिरको पहिरोले सडक अवरुद्ध गरेपछि पिढ्युमा विरामी बोकेर पहिरो कटाउँदै सर्वसाधरणहरु ।
